पुणे : ‘प्लास्टिक, कचरामुक्त मुळशी तालुका’ अभियानास सोमवारी बेलावडे (ता. मुळशी) येथे प्रारंभ करण्यात आला. लायन्स क्लब ऑफ पुणे कोथरुड, एन्व्हायर्नमेंटल क्लब ऑफ इंडिया या संस्थांनी या अभियानासाठी पुढाकार घेतला आहे. ‘लायन्स’ आणि ‘एन्व्हायर्नमेंटल’च्या वतीने प्लास्टिक समस्या सोडविण्यासाठी प्लास्टिक कचऱ्याला पाच रुपये हमी भाव देण्यात येणार आहे.
‘लायन्स’चे माजी प्रांतपाल फत्तेचंद रांका, कोथरूड लायन्स क्लबचे अध्यक्ष नागेश चव्हाण, सरपंच कल्पना जंगम, गट विकास अधिकारी डॉ. स्मिता पाटील, एन्व्हायर्नमेंटल क्लब ऑफ इंडियाचे अध्यक्ष नीलेश इनामदार, प्रकल्प प्रसार प्रमुख ललित राठी यांच्या प्रमुख उपस्थितीत अभियानाला प्रारंभ करण्यात आला.
प्लास्टिक वापराबद्दल प्रबोधन, प्लास्टिक कचरा संकलन, प्लास्टिक कचऱ्यावर प्रक्रिया अशी या अभियानाची वैशिष्टये आहेत. सामुहिक प्रयत्नातून हा तालुका देशातील पहिला प्लास्टिक कचरामुक्त तालुका करण्याचा निर्धार या कार्यक्रमात करण्यात आला.
फत्तेचंद रांका यांनी या उपक्रमास शुभेच्छा दिल्या. या प्रसंगी कोथरूड लायन्स क्लबचे काशीनाथ येनपुरे, माजी सरपंच धैर्यशील ढमाले, माजी सभापती बाबा कंधारे, अभय शास्त्री आदी उपस्थित होते.
